रुपन्देही -बुटवल उपमहानगरपालिका-२ तिनाउ पुलस्थित सडकमा बा।१९ च ९१५७ नम्बरको स्कारपियो गाडीले लु. २४ प २७५७ नम्बरको मोटरसाइकललाई शनिबार राति ठक्कर दिँदा मोटरसाइकल चालक अर्घाखाँची सन्धिखर्क नगरपालिका-१ घर भएका ३० वर्षीय वाशु आचार्यको मृत्यु भएको छ । दुर्घटनामा गम्भीर घाइते भएका उनको लुम्बिनी प्रादेशिक अस्पताल बुटवलमा उपचारको क्रममा मृत्यु भएको हो । स्कारपियो चालकलाई प्रहरीले नियन्त्रणमा लिएको छ । यसैगरी बाजुरा जिल्ला बुढिगंगा नगरपालिका-६ स्थित सडकमा सु.प.प्र.०१-००८ प ४०५० नम्बरको मोटरसाइकल आफैँ अनियन्त्रित भई शनिबार राति दुर्घटना हुँदा मोटरसाइकल चालक बाम्का बजारमा सुनचाँदी पसल गरी बस्ने अछाम साँफेबगर नगरपालिका घर भएका ३८ वर्षीय बल सुनारको मृत्यु भएको छ । दुर्घटनामा गम्भीर घाइते भएका उनको बयलपाट अस्पताल अछाममा उपचारको क्रममा मृत्यु भएको हो । साथै दुर्घटनामा घाइते भएका मोटरसाइकलमा सवार त्रिवेणी नगरपालिका-४ बस्ने ३६ वर्षीय गगन साउदको सोही अस्पतालमा उपचार भइरहेको छ । यसैगरी मोरङ जिल्ला सुन्दरहरैँचा नगरपालिका-८ सलकपुरस्थित सडकमा हाल नम्बर नखुलेको सवारी साधनको ठक्करबाट साईकलयात्री नाम, थर, वतन नखुलेका करिब ३० वर्षीय पुरुषको गएराति मृत्यु भएको छ । ठक्करबाट गम्भीर घाइते भएका उनको धरान घोपामा उपचारको क्रममा मृत्यु भएको हो । ठक्कर दिने सवारी साधन र चालकको प्रहरीले खोजी कार्य गरिरहेको छ । दुर्घटनाका सम्बन्धमा प्रहरीले थप अनुसन्धान गरिरहेको छ ।00
