बैंकिङ कसूर मुद्दाका फरार प्रतिवादी पक्राउ

काठमाडौं जिल्ला बुढानिलकण्ठ नगरपालिका–९ गोल्फुटार बस्ने बारा जितपुर सिमरा उपमहानगरपालिका–१४ स्थायी घर भएका बैंकिङ कसूर मुद्दाका फरार प्रतिवादी २६ वर्षीय अनिस सुन्दासलाई सोमबार प्रहरीले पक्राउ गरेको छ ।
उच्च अदालत ललितपुरको २०७७ चैत ८ गतेको फैसलाले ७ दिन कैद र ७ लाख रुपैयाँ जरिवाना ठहर भई फरार रहेका उनलाई प्रहरी प्रधान कार्यालय केन्द्रीय अनुसन्धान ब्यूरो महाराजगंजबाट खटिएको प्रहरीले काठमाडौं सुन्दरीजलमा फेला पारी पक्राउ गरेको हो ।
सुदान्सले आफ्नो खातामा पर्याप्त मौज्दात रकम नभएको भन्ने जानी जानी पीडितहरूलाई झुक्यानमा पारी लक्ष्मी बैंकको चेक दिएर बैंकिङ कसूरजन्य अपराध गरेको ठहर गरी अदालतले उनलाई उक्त फैसला गरेको थियो । सुदान्सलाई फैसला कार्यान्वयनको लागि जिल्ला अदालत ललितपुरमा पेश गरिएको उक्त ब्यूरोले जनाएको छ ।