लेखकः आरएस रावल
आजको समयमा राम्रो स्कुल महँगो शुल्क र आकर्षक सुविधाहरूले मात्र परिभाषित हुँदैन। साँचो अर्थमा एउटा राम्रो स्कुल भनेको जहाँ विद्यार्थीहरूको बौद्धिक, नैतिक र व्यवहारिक विकासलाई प्राथमिकता दिइन्छ, त्यो हो। स्कुलको उद्देश्य विद्यार्थीहरूलाई मात्र पाठ्यपुस्तकको ज्ञान दिने होइन, उनीहरूलाई जीवनमा आवश्यक पर्ने व्यवहारिक सीपहरू प्रदान गर्नु पनि हो।
बर्तमान शिक्षा प्रणालीको चुनौती भनेको धेरै जसो शैक्षिक संस्थाहरू नाफामुखी हुँदै जानु हो, जहाँ गुणस्तरीय शिक्षा भन्दा पनि व्यापारमुखी सोच हावी भइरहेको छ। स्कुलले विद्यार्थीको भविष्य निर्माण गर्नतर्फ केन्द्रित हुनु आवश्यक छ, र त्यो गुणस्तरीय शिक्षा, जीवन मूल्य, र नेतृत्व विकासका माध्यमबाट मात्र सम्भव छ।
एक कुशल प्रिन्सिपलले यस्तो शिक्षा प्रणालीमा ठूलो भूमिका खेल्छन्। उनी विद्यालयको नेतृत्वमात्र गर्दैनन्, तर शिक्षक र विद्यार्थीलाई प्रोत्साहित गर्ने प्रेरणादायी व्यक्तित्व पनि हुन्। प्रिन्सिपलले विद्यालयमा सकारात्मक वातावरण सिर्जना गर्नु पर्छ, जसले विद्यार्थीलाई बाह्य क्रियाकलाप, परियोजना, इन्टर्नशिप, र व्यवहारिक सीपहरू सिक्न सहयोग पुर्याउँछ।
अहिलेको समयमा विद्यार्थीहरूलाई व्यावसायिक र व्यक्तिगत जीवनमा सफल बनाउने शिक्षा दिन आवश्यक छ। शैक्षिक संस्थाहरूले विद्यार्थीहरूलाई कक्षाकोठाभन्दा बाहिरको वास्तविक जीवनका चुनौतीहरूको सामना गर्ने अवसर दिनुपर्छ। यसले मात्र उनीहरूको सम्पूर्ण विकास सम्भव हुन्छ र भविष्यमा आत्मनिर्भर बनाउँछ।
हामीले अब महँगो शुल्कभन्दा गुणस्तरीय शिक्षामा जोड दिनु आवश्यक छ। शैक्षिक संस्थाहरूले समाजका लागि समर्पित र उत्तरदायी नागरिकहरू उत्पादन गर्ने लक्ष्य राख्नुपर्छ। यसप्रति ध्यान दिन सकेमा मात्रै हामी हाम्रा विद्यालय र तिनले उत्पादन गरेका विद्यार्थीहरूमाथि गर्व गर्न सक्छौं।
