मुगु बस दुर्घटनाको मुख्य कारण टायर पञ्चर भएको प्रहरीको प्रारम्भिक अनुमान

मंगलबार बाँकेको नेपालगन्जबाट मुगु जादै गरेको छायाँनाथ रारा यातायात प्रा.लि. को भे १ख ३१६७ नं को यात्रुवाहक बसको टायर पञ्चर भई दुर्घटना भएको प्रहरीको प्रारम्भिक अनुमान बाट खुल्न आएको छ । ४६ जना यात्रु रहेका उक्त दुर्घटनामा परी ३२ जनाले ज्यान गुमाएका छन ।मंग्लवार दिउँसो १ बजे छायाँनाथ रारा नगरपालिका-७ पिना गाउँको तपने खोलामा बस दुर्घटनामा परेको थियो । पाँच सय मिटर जति तल खसेको थियो ।दुर्घटना भएको बसको चालक बस्ने साइडतिरको टायर पङ्चर भई बस अनियन्त्रित भएर दुर्घटना भएको प्रहरीले जनाएको हो । उक्त दुर्घटनमा परेर १३ जना घाइते भएको प्रहरीले बताएको छ । दुर्घटना समयमा पिना चौकीको प्रहरी गस्ती घटनास्थल मुनि रहेको थियो । प्रहरी गस्तीले ठूलो आवाज आएको सुन्ने बित्तिकै बस भिरबाट खसेको देखेका र बसको अवस्था हेर्दा चालक तिरको टायर च्यातिएको देख्दा दुर्घटना अन्य कारण नभई टायर पङ्चर भएका कारण भएको अनुमान गरिएको छ ।